ဒေါက်တာဆာဆာက ဗုံးလုပ်နည်းသင်တန်းသို့ အလည်သွားခြင်း

Hello!

Stay up to date with New Naratif’s latest stories and upcoming events with our weekly newsletter. No spam, just good content.

* indicates required

Your Email Address *

အယ်ဒီတာ့မှတ်စု – ဤဆောင်းပါးနှင့်ပတ်သက်၍ NUG၏ တောင်းဆိုချက်များအား ကျွန်ုပ်တို့ မ လိုက်နာပါက တရားဥပဒေအရ ဆက်လက် အရေးယူဆောင်ရွက်သွားမည်ဖြစ်ကြောင်း မြန်မာနိုင်ငံ အမျိုးသားညီညွတ်ရေးအစိုးရ (NUG)၏ ပြောရေးဆိုခွင့်ရှိသူက ခြိမ်းခြောက်ခဲ့ပါသည်။ ၎င်းတို့၏ တောင်းဆိုချက်များနှင့် New Naratif ၏ တုံ့ပြန်ချက်များကို ဤနေရာတွင် တွေ့နိုင်ပါသည်။

ဇွန်လ ၁၄ ရက်နေ့၊ ဆောက်လုပ်ရေး သုံးပစ္စည်းများ၊ လုံခြုံရေး ပစ္စည်းကိရိယာများ၊ ပုစုခရု ဗူးပေါင်းစုံနှင့် အချို့ဗူးများပေါ်တွင် ယမ်းမှုန့်ဟု စာတမ်းကပ်ထား သောဗူးများနှင့် ပြည့်နှက်၍ မီးရောင် မှိန်ပျပျထွန်း ထားသော အခန်းထဲ၌ အဖြူရောင်တီရှပ်၊ ဘေ့စ်ဘော ဦးထုပ်နှင့် ရွှေရောင်မုတ်ဆိတ်မွှေးရှိသူတစ်ဦးကို သူ၏webcam ကင်မရာမှတစ်ဆင့် တွေ့မြင်ရလျက် ရှိသည်။

ထိုသူက ကင်မရာထဲမှတစ်ဆင့် သူ၏ရှေ့တွင်ရှိသော စိန်ပြောင်းအခွံများ၊ အမြောက်လက်နက်များ၊ zip gunဟု လူသိများသော အိမ်လုပ်သေနတ်များကို ယူလာပြီး ထိုနေ့က ယင်းပစ္စည်းများ တပ်ဆင်ရန် “နာရီပေါင်းများစွာကြာအောင် ပြင်ဆင်ခဲ့ရကြောင်း” ပြောပြလျက်ရှိသည်။

“ဒီနေ့ ကျွန်တော် ၁၀ပေါင် အလေးချိန်ရှိတဲ့ စိန်ပြောင်းတစ်ခုကို အပြည့် ဆင်ထားတယ်၊ ခင်ဗျားတို့ကိုပြမယ်”ဟု သူ၏ သင်ခန်းစာကို ကြည့်ရှုရန် Zoomမှတဆင့် ရောက်ရှိလာကြသော ပရိတ်သတ် အယောက် ၄၀ခန့်အား ပြောကြား ခဲ့သည်။

အမေရိကန်မုဆိုး တစ်ဖြစ်လဲ မိမိကိုယ်ကို စက်ပြင် ဆရာဟု သတ်မှတ်ထားသော Marc Andre LeQuieu က နောက်ထပ်နှစ်နာရီခန့်အတွင်း ယင်း၏ အလုပ် စားပွဲပေါ်၌ မြန်မာ့တပ်မတော်ကို ဆန့်ကျင်သော လက်နက်မျိုးစုံ တည်ဆောက်ရေးနည်းများကို ပစ္စည်းများနှင့်တကွ ကင်မရာမှတစ်ဆင့် ရှင်းပြလျက်ရှိသည်။ မြန်မာ့တပ်မတော်သည် ဖေဖော်ဝါရီလတွင် အရပ်သားအစိုးရကို ဖြုတ်ချခဲ့ပြီး ယင်းတို့အုပ်ချုပ်မှုအား ဆန့်ကျင်သည်ဟု သံသယရှိသူ လူတစ်ထောင်ကျော်ကိုလည်း သတ်ဖြတ်ခဲ့သည်။

ကော်ဖီဗူးများ၊ PVC ပိုက်များ၊ ယမ်းမည်းများနှင့် အမိုနီယံ နိုက်ထရိတ် (ယမ်းစိမ်း) ပါဝင်သော ပစ္စည်းများကို သူက စာရင်းပြုစုပြီး “စိန်ပြောင်း တစ်ခုလုပ်နည်းကို ငါပြမယ်” ဟု ကြည့်ရှုနေသူများ ကို ပြောကြားလိုက်သည်။

ယခု Zoom အစည်းအဝေးသည် ဒီမိုကရေစီကို လိုလားသော တက်ကြွလှုပ်ရှားသူများ၊ ပြောက်ကျား တိုက်ခိုက်ရေးသမားများ၊ တစ်ခါတစ်ရံတွင် နိုင်ငံတကာမှ လူသားချင်း စာနာထောက်ထားရေး အကူအညီပေးသူများနှင့် မတ်လမှ သြဂုတ်လ အတွင်းပြုလုပ်ခဲ့သည့် LeQuieu၏ Zoom အစည်း အဝေး ၆ခုထဲမှ ၁ခုဖြစ်သည်။ သူသည် သင်တန်းသား များအား သေနတ်များနှင့် ဖောက်ခွဲရေးနည်းများကို သင်ကြားပေးသည့်အပြင် လေကြောင်းတိုက်ခိုက်မှု များနှင့် ကြုံလာရပါက ရေချိုးကန်များအတွင်း ပုန်းအောင်းခြင်း၊ အာလူးကို အသုံးပြု၍ ကားတစ်စီး ကို စက်သတ်ခြင်း၊ “မစင်အညစ်အကြေး” နှင့် “salmonella ဘက်တီးရီးယားကို အူလမ်းကြောင်းထဲ ထည့်၍ အစာအဆိပ်သင့်စေခြင်း” တို့ဖြင့် “လူကိုဖျားနာစေခြင်းများ” ပြုလုပ်ကာ လွတ်မြောက် ရန် လုပ်ဆောင်နိုင်ကြောင်း အကြံဥာဏ်ပေးခဲ့သည်။

သူသည် Ragnar ၏ အိမ်လုပ်လက်နက်များ (Ragnar’s Homemade Weapons)၊ CIA သော့ခလောက်ဖွင့်နည်း (CIA Lock Picking) နှင့် ပြည်သူ့စစ်တပ် ထူထောင်ရန် မည်သို့    လေ့ကျင့်ရ မည်နည်း (How to Start and Train a Militia Unit) ကဲ့သို့သော ခေါင်းစဉ်များပါရှိသည့် e-book များကို လည်း တက်ရောက်သူများအား ဝေမျှခဲ့သည်။

ဧပြီလ ၅ ရက်နေ့မှ အစည်းအဝေးတစ်ခုတွင် LeQuieu က “အားထုတ်မှုတွေ အရာရောက်ဖို့အ တွက် အကြမ်းဖက်မှုတွေကို လုပ်ဆောင်တဲ့အခါမှာ ဇွဲရှိရမယ်”ဟု တက်ရောက်သူများအား ပြောကြားခဲ့ သည်။ “အခန်းထဲမှာ အောင်းနေပြီးတော့ အကြမ်းဖက်မှုအကြောင်း တရားဟောတဲ့ လူဖြူတစ်ယောက်တော့ ကျုပ်မဖြစ်ချင်ပါဘူး၊ ဒါပေမယ့် အကြမ်းဖက်မှုတွေ အဆုံးသတ်ဖို့အတွက် အဲဒီ့ထက် ပိုပြင်းထန်တဲ့ အကြမ်းဖက်မှု လုပ်ရပ်တစ်ခု လိုအပ်တယ်။ ဒါကြောင့် အမေရိကားမှာ ငါတို့ပြောနေကျ စကားတစ်ခွန်းရှိတာပေါ့ – သေနတ်ကိုင်ထားတဲ့ လူဆိုးကို တားဖို့ဘာလုပ်ရမလဲ။ သေနတ်ကိုင်ထားတဲ့ လူကောင်းက ဖြေရှင်းရလိမ့်မယ် – ဆိုတာပဲ။”

ဇွန်လ ၁၄ ရက်နေ့ အစည်းအဝေး၌ LeQuieu (၄၄ နှစ်)က လက်လုပ်သေနတ်မျိုးစုံ အသုံးပြုမှုပုံစံများကို စာရင်းပြုစုပြီး သင်ခန်းစာ ပို့ချလျက်ရှိစဉ် တစ်နာရီခန့်အကြာတွင် တက်ရောက်နေသူတစ်ဦးက ရုတ်တရက် “အစည်းအဝေး တက်ရောက်လာတဲ့ ဒေါက်တာ ဆာဆာ့ကို ကြိုဆိုချင်လို့ပါ”ဟု ဖြတ်ပြောလိုက်သည်။

အမျိုးသားညီညွတ်ရေးအစိုးရ (NUG)၏ အပြည် ပြည်ဆိုင်ရာ ပူးပေါင်းဆောင်ရွက်ရေးဝန်ကြီးနှင့် ပြောရေးဆိုခွင့်ရှိသူ ဒေါက်တာဆာဆာသည် တက်ရောက်လာသူများအား မိနစ် ၂ဝ ခန့်ကြာစွာ ကျေးဇူးတင်စကားနှင့် ချီးကျူးစကားများ ပြောကြား ခဲ့ပြီးနောက် သူသည် စစ်တပ်ကို အနိုင်ယူရန် “ကြိုးပမ်းအားထုတ်နေသူအားလုံးကို အားပေး ကြောင်း” ဖွင့်ဟပြောကြားခဲ့သည်။

မြန်မာနိုင်ငံအကြောင်း အနည်းငယ်မျှသာ သိရှိသော်လည်း နိုင်ငံတွင်းရှိ အာဏာသိမ်းမှုဆန့်ကျင်ရေး လှုပ်ရှားသူများအား လက်နက်စွဲကိုင်ရန် ထောက်ခံသူတစ်ဦး ဖြစ်သည့် အမေရိကန် လက်နက်ဝါသနာရှင်တစ်ဦး က ဦးဆောင်သည့် လက်နက်ပြုလုပ်နည်း အွန်လိုင်း သင်တန်းတွင်  NUG၏ထိပ်တန်းခေါင်းဆောင် တစ်ဦးက တက်ရောက်နေခြင်းသည် ဒီမိုကရေစီ နည်းအရ တရားဝင် အသိအမှတ်ပြုခံရနိုင်ရန် ကြိုးပမ်းလျက်ရှိသော အဓိကခေါင်းဆောင်အား လျှို့ဝှက်ထားသည့်NUGအစိုးရအနေဖြင့် စစ်ကောင်စီကို ဆန့်ကျင်မည့် “ပြည်သူလူထုရဲ့ ခုခံစစ်”ကို ဟန်ချက်ညီစေရန် မည်သို့မည်ပုံ ဆောင်ရွက်မည်ဆိုသည့်ကိစ္စအား မေးခွန်းထုတ်စရာပင် ဖြစ်နေသည်။

သွေးမြေကျမှု မရှိစေရ

NUG စတင်ဖွဲ့စည်းသည့် အချိန်မှစ၍ လက်နက် ကိုင် တော်လှန်ရေးဖြင့် စစ်တပ်ကို အစားထိုးနိုင်ရန်မှာ ၎င်းတို့ဗျူဟာ၏ တစ်စိတ်တစ်ပိုင်း ဖြစ်သည်။ NUGကို ဧပြီလတွင် စတင်ဖွဲ့စည်းခဲ့ပြီး အဖွဲ့ဝင် အများစုမှာ ဒေါ်အောင်ဆန်းစုကြည်၏ ပါတီဖြစ်သော အမျိုးသားဒီမိုကရေစီအဖွဲ့ချုပ် (NLD)မှ အဖွဲ့ဝင်များ ဖြစ်ကြ သည်။ မေလတွင် NUGသည် လက်နက်ကိုင် တော်လှန်ရေးအဖွဲ့ဖြစ်သော ပြည်သူ့ကာကွယ်ရေး တပ်မတော် (People’s Defense Force)ကို တည်ထောင်ခဲ့သည်။

ဒေသတွင်းလုံခြုံရေး လေ့လာသုံးသပ်သူ Anthony Davis၏အဆိုအရ PDFတပ်ဖွဲ့များကို ယခုအခါတွင် တပ်မတော်နှင့် ဆယ်စုနှစ်ပေါင်းများစွာ တိုက်ခိုက်လာ ခဲ့သော မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF)၊ ကရင်အမျိုးသား လွတ်မြောက်ရေး တပ်မတော် (KNLA) နှင့် ကချင်လွတ်မြောက်ရေး တပ်မတော် (KIA) ကဲ့သို့သော ဝါရင့်လက်နက်ကိုင်အဖွဲ့များက လေ့ကျင့်ပေးနေကြသည်ဟုဆိုသည်။

PDFကို ဖွဲ့စည်းပြီး ရက်သတ္တပတ်များစွာ အကြာတွင် NUGသည် စစ်ဘက်ဆိုင်ရာကျင့်ဝတ်များကို ပြဌာန်းခဲ့ပြီး ထိုအထဲတွင် ခုခံတိုက်ခိုက်ရေးသမားများ အား “အရပ်သားများအား မခြိမ်းခြောက်ရ၊ ပစ်မှတ် မထားရ (သို့) မတိုက်ခိုက်ရ။” ဟုလည်း ဖော်ပြထား သည်။ မကြာသေးမီလများအတွင်းက NUG သည် အများပြည်သူအား မိမိကိုယ်ကို ကာကွယ်မှုအတွက် အကြမ်းဖက်မှုကို အသုံးပြုရာတွင် ခွင့်ပြုကြောင်း မိန့်ခွန်းများစွာတွင် ပြောကြားခဲ့သည်။

စက်တင်ဘာလ ၇ ရက်နေ့တွင် လပေါင်းများစွာသော ကောလဟာလများကြားမှ ရောက်ရှိလာသော “D-Day”တွင် NUG သည် “စစ်အာဏာရှင်စနစ်ကို ဆန့်ကျင်သော ပြည်သူလူထု၏ ခုခံစစ်ပွဲ” ဟု ကြေညာခဲ့ပြီး အရပ်သားများအား တပ်မတော်ကို ချေမှုန်းရာတွင် “PDF တပ်ဖွဲ့များနှင့် ပူးပေါင်း၍ ကူညီကာကွယ်ပေးရန်” တောင်းဆိုခဲ့သည်။

သို့သော်လည်း အာဏာသိမ်းပြီးနောက်ပိုင်း ကာလတစ်လျှောက်လုံးတွင် အကြမ်းဖက်မှုကို ကြိုတင်ကန့်သတ်မည်ဆိုသော ကတိကဝတ်သည် မြန်မာတစ်နိုင်ငံလုံး အတိုင်းအတာအရ ငြိမ်းချမ်းစွာ ဆန္ဒပြခဲ့ကြသော လူထုဆန္ဒပြပွဲများ၊ CDM နှင့် သပိတ်မှောက်ခြင်းများ သိသိသာသာ ပါဝင်သည့် ဒီမိုကရေစီ ထောက်ခံရေး လှုပ်ရှားမှုများ၏ လွှမ်းမိုးမှုအောက်တွင် ကဏ္ဍအသေးစားတစ်ခု အနေဖြင့်သာ ဆောင်ရွက်ခဲ့သည်။ တပ်မတော်ကို တိုက်ခိုက်ရာတွင် ယနေ့ထက်တိုင်အထိ စစ်ရေးအောင်မြင်မှု အနည်းငယ်သာ ရှိခဲ့ပြီး နိုင်ငံတကာ အကူအညီနှင့် လက်နက်ကိရိယာ ဝယ်ယူခြင်းများ မပါဝင်ဘဲ တပ်မတော်ကို အနိုင်ရယူနိုင်ရန် အလားအလာနည်းနေသောကြောင့် NUGသည် ယင်းတို့၏လူချစ်လူခင်ပေါများသော နိုင်ငံတကာ ပြောရေးဆိုခွင့်ရှိသူ ဒေါက်တာဆာဆာ အဓိကဦးဆောင်မှုဖြင့် နိုင်ငံတကာ ထောက်ပံ့မှု ရရှိ ရေးအတွက် အာရုံစိုက်ခဲ့ကြသည်။

အာဏာသိမ်းမှုအပြီးတွင် ဒေါက်တာဆာဆာသည် နိုင်ငံတွင်းရှိ လူမျိုးမတူကွဲပြားမှုများနှင့် ယင်းတို့၏ လူ့အခွင့်အရေးများအပေါ် ထားရှိသော NUG၏ ကတိကဝတ်များအကြောင်း၊ ၎င်းတို့၏ လုပ်ပိုင်ခွင့် များကို တွေ့ဆုံမေးမြန်းမှုများစွာတွင် အစဉ်တစ်စိုက် ပြောကြားခဲ့သည်။ သူ၏ကြိုးစားအားထုတ်မှုကြောင့် ရလဒ်အချို့  ရရှိစေခဲ့သည်။ ဇွန်လတွင် ကုလသမဂ္ဂ အထွေထွေညီလာခံ၌ (ဒေါက်တာဆာဆာ ပါဝင်သည့် ပါတီဖြစ်သော NLDပါတီက မဲအပြတ်အသတ်ဖြင့် အနိုင်ရရှိခဲ့သည့်) မြန်မာစစ်တပ်ကို ၂ဝ၂ဝ ခုနှစ်၊ နိုဝင်ဘာလ အထွေထွေရွေးကောက်ပွဲရလဒ်များအား လေးစားရန် ကမ္ဘာ့ကုလသမဂ္ဂက တညီတညွတ် တည်း တောင်းဆိုခဲ့သည်။

“အခန်းထဲမှာ အောင်းနေပြီးတော့ အကြမ်းဖက်မှုအကြောင်း တရားဟောတဲ့ လူဖြူတစ်ယောက်တော့ ကျုပ်မဖြစ်ချင်ပါဘူး၊ ဒါပေမယ့် အကြမ်းဖက်မှုတွေ အဆုံးသတ်ဖို့အတွက် အဲဒီ့ထက် ပိုပြင်းထန်တဲ့ အကြမ်းဖက်မှု လုပ်ရပ်တစ်ခု လိုအပ်တယ်။ ဒါကြောင့် အမေရိကားမှာ ငါတို့ပြောနေကျ စကားတစ်ခွန်းရှိတာပေါ့ – သေနတ်ကိုင်ထားတဲ့ လူဆိုးကို တားဖို့ဘာလုပ်ရမလဲ။ သေနတ်ကိုင်ထားတဲ့ လူကောင်းက ဖြေရှင်းရလိမ့်မယ် – ဆိုတာပဲ။”

ကုလသမဂ္ဂကော်မတီနှင့် အထွေထွေညီလာခံသည် ကမ္ဘာ့ကုလသမဂ္ဂတွင် NUG အစိုးရ (သို့) တပ်မတော်အနေဖြင့် မြန်မာနိုင်ငံအား ကိုယ်စားပြုသင့်မသင့်ကို လာမည့် စက်တင်ဘာလ ၁၄ ရက်နေ့တွင် ထပ်မံစစ်ဆေးမည် ဖြစ်ပြီး ဖြစ်နိုင်ချေရှိသည်မှာ ဆုံးဖြတ်ချက်ချခြင်းကို အချိန်ဆွဲမည့်သဘော ဖြစ်နိုင်သည်။

သြဂုတ်လ ၃ဝ ရက်နေ့ မိန့်ခွန်းတွင် ဒေါက်တာဆာဆာ က နယူးဇီလန်နိုင်ငံရှိ ဥပဒေပြုအမတ်များအား “NUGကို မြန်မာနိုင်ငံနှင့် မြန်မာပြည်သူလူထုတို့၏ တစ်ဦးတည်းသော ကိုယ်စားလှယ်အဖြစ် လက်ခံခြင်းအားဖြင့် မြန်မာပြည်သူများ၏ အသက်ရှင်ရပ်တည်ရေးကို ကူညီနိုင်ရန်အတွက် ကုလအထွေထွေညီလာခံမှာ စွမ်းအားရှိသမျှ ကူညီပေးပါ။”ဟု တောင်းဆိုခဲ့သည်။

မဲခွဲဆုံးဖြတ်မှုများမတိုင်ခင်တွင် ဒေါက်တာဆာဆာ သည် နိုင်ငံတကာပရိသတ်များရှေ့တွင် ရိုးရှင်းသော ဘဝကို ဖြတ်သန်းသူအဖြစ် တင်ပြခဲ့ပြီး သတင်းသမားများ၏ မေးမြန်းမှုများတွင်လည်း အာဏာသိမ်းမှုအပြီး ၎င်းအနေဖြင့် အငှားယာဉ်မောင်းတစ်ဦးအဖြစ် ဟန်ဆောင်ကာ သီသီလေး လွတ်မြောက်လာပုံအကြောင်း၊ သူ၏ မွေးသက္ကရာဇ် အတိအကျကို ဘယ်သောအခါမှ မသိခဲ့ရသည့် တောင်တန်းထူထပ်သော ချင်းပြည်နယ်တွင် ရပိုင်ခွင့် နည်းပါးစွာ ကြီးပြင်းလာခဲ့ရသည့်အကြောင်း နှင့် ချားလ်စ်မင်းသား ၏ အထောက်အပံ့ဖြင့် သူ၏ကျေးရွာ၌ ဆေးဘက်ဆိုင်ရာ လူသားချင်း စာနာထောက်ထားမှု အဖွဲ့အစည်းတစ်ခုကို အောင်မြင်စွာ တည်ထောင်နိုင်ခဲ့ကြောင်းစသည့် အကြောင်းအရာများကို ပြောကြားလေ့ရှိသည်။

ဖြစ်ရပ်တစ်ခုတွင် ဒေါက်တာဆာဆာသည် အမေရိကန်သမ္မတ ဂျိုးဘိုင်ဒန်အား NUGကို အသိအမှတ်ပြုရန်နှင့် “ကျွန်ုပ်တို့သည် တိုက်ခိုက်ခြင်းမရှိဘဲ၊ သွေးမြေကျခြင်းမရှိဘဲ အောင်မြင်လိုသည်” ဟု အလေးပေး ပြောကြားခဲ့ သည်။

ပြည်သူလူထု၏အသက်အိုးအိမ်စည်းစိမ်များကို ကာကွယ်ပါမည်ဟု NUG၏ နှုတ်ကတိသည် ယင်းတို့၏အဖွဲ့အစည်းကို ထောက်ခံမှုရရန် အဓိက ဆွဲဆောင်မှုများထဲမှ တစ်ခုဖြစ်သည်။ လွတ်လပ်သော လူ့အခွင့်အရေးဆိုင်ရာ ပညာရှင်များဖြင့် ဖွဲ့စည်းထားသည့် မြန်မာနိုင်ငံဆိုင်ရာ အထူးအကြံပေးကောင်စီ (Special Advisory Council)က NUG အနေဖြင့် နိုင်ငံတကာပြစ်မှု တရားရုံး (ICC)၏ ရောမသဘောတူစာချုပ် (Rome Statute)တွင် ပါဝင်သော ပါတီတစ်ခု ဖြစ်လာစေရန် (ယခင်က တပ်မတော်အနေဖြင့် မဆောင်ရွက်ခဲ့သော) အဓိကအချက်တစ်ချက်အနေဖြင့် NUG၏ ကြိုးပမ်းအားထုတ်မှုများကို ကိုးကား၍ အခြားအစိုးရများသည် ၎င်းတို့ကို အသိအမှတ်ပြုသင့်ကြောင်း ပြောဆိုခဲ့သည်။

သို့သော်လည်း NUG က တပ်မတော်ကို ခုခံတွန်းလှန်စစ် ကြေညာပြီး နောက်တစ်နေ့ဖြစ်သော စက်တင်ဘာ ၈ ရက်နေ့၌ အထက်တွင် ဖော်ပြခဲ့သော အဆိုပါ လူ့အခွင့်အရေး ကျွမ်းကျင်သူများ အဖွဲ့ထဲမှ အဖွဲ့ဝင်တစ်ဦးကပင် အကြမ်းဖက်မှုသည် မြန်မာပြည်သူများ ဒုက္ခခံစားရခြင်းရဲ့ အဓိက အကြောင်းအရင်းတစ်ခုဖြစ်ပြီး ဖြေရှင်းချက်မဟုတ်ကြောင်း မှတ်ချက်ပြုခဲ့သည်။ “မိမိတို့အနေဖြင့် NUG ကို စာနာသော်လည်း ၎င်းတို့ရဲ့ ဆုံးဖြတ်ချက်ကြောင့် ဖြစ်လာနိုင်မယ့်အရာတွေအတွက် စိုးရိမ်ပူပန်မိပါတယ်”ဟု ကြေညာချက်တစ်ခုတွင် ပြောကြားခဲ့သည်။

LeQuieuသည် မြန်မာနိုင်ငံမှ လူ့အခွင့်အရေး တက်ကြွလှုပ်ရှားသူများ၊ တိုက်ခိုက်ရေးသမားများနှင့် အစည်းအဝေးပြုလုပ်ရာ၌ တက်ရောက်သူများ အနေဖြင့် အကြမ်းဖက်မှုကို သတိကြီးစွာ ကိုင်တွယ်သင့်ကြောင်း၊ ရှေ့တွင်လမ်းခင်းခဲ့သော သံတမန်ရေးရာ တိုးတက်မှုများအပေါ် ခြိမ်းခြောက်မှု များရှိနိုင်သည်ကို သတိထားသင့်ကြောင်း သူက ပြောကြားခဲ့သည်။

“ပြောက်ကျားစစ်ဆင်ရေးနဲ့ အကြမ်းဖက် လှုပ်ရှားမှုတွေမှာ ခင်ဗျားတို့ အရမ်းသတိထားရမယ်” ဟု သူက တက်ရောက်သူများအား မေလ ၃၁ ရက်နေ့တွင် ပြောကြားခဲ့သည်။ “အရပ်သား ထိခိုက်သေဆုံးမှုတွေ ရှိလိမ့်မယ်လို့ မျှော်လင့်ထားသင့်တယ်။ ဒါပေမယ့် အဲဒါကို ရှောင်ရှားနိုင်ဖို့ အားကုန်ထုတ် ကြိုးစားသင့်တယ်။ ဘာကြောင့်လဲဆိုတော့ ထိခိုက်သေဆုံးမှုတွေ ပါလာရင် လူထုရဲ့အမြင်၊ နိုင်ငံတကာရဲ့ အမြင်တွေ ပြောင်းလဲသွားနိုင်တယ်။”

မည်သို့ပင်ဆိုစေကာမူ အန္တရာယ်များသော လက်နက်များ ဖန်တီးပုံကို သူက ဆက်လက်သင်ကြား ပေးခဲ့သည်။ ဇွန်လ ၁၄ ရက်နေ့တွင် သူသည် သံမဏိ ပိုက်ကို အသုံးပြု၍ “ချွန်ထက်သောအပိုင်းအစ ကိရိယာ” တစ်ခုကို ပြုလုပ်ရန် အကြံပြုခဲ့သည်။ ထို့နောက် သူသည် “အမြောက်အသေးစားများ” ပြုလုပ်ပုံကို ရှင်းပြခဲ့ပြီး “ဒီစိန်ပြောင်းထဲကို မင်းတို့ ထည့်လိုက်တဲ့ အရာတွေအားလုံး (ဥပမာ – သံချောင်းအတွဲလိုက်)က အရှိန်အပြင်းစားနဲ့ ပြန်ထွက်လာလိမ့်မယ်” ဟု ပြောကြားခဲ့သည်။

ထိုအစည်းအဝေး တွေ့ဆုံမှု မိနစ် ၂ဝ ခန့်အကြာတွင် ဒေါက်တာဆာဆာ ရောက်ရှိလာပြီး သူက တက်ရောက်လာသူများကို မိန့်ခွန်းပြောကြားခဲ့သည်။ – “ဒီစစ်အာဏာရှင်စနစ်ကို အနိုင်ယူနိုင်ဖို့အတွက် ဒီမှာ ရှိနေကြတဲ့သူတွေက တစ်ထောင့်တစ်နေရာကနေ တတ်နိုင်သမျှ ပါဝင်လုပ်ဆောင်ပေးနေကြတဲ့အတွက် အားလုံးကို ကျေးဇူးတင်ပါတယ်။ ခင်ဗျားတို့ လုပ်နေ တာတွေကို ဆက်ထိန်းထားနိုင်လိမ့်မယ်လို့ မျှော်လင့်ပါတယ်” ဟူ၍ ဖြစ်သည်။

အမည်မဖော်လိုသော အစည်းအဝေး တက်ရောက်သူ တစ်ဦးက အစည်းအဝေး၌ ဒေါက်တာဆာဆာကို တွေ့ဆုံရခြင်းသည် NUGက ပြည်သူလူထုဘက်၌ ရှိနေသည်ဟုဆိုလိုခြင်း ဖြစ်သောကြောင့် ဝမ်းသာမိ ကြောင်း New Naratifကို ပြောကြားခဲ့သည်။

LeQuieuဆိုတာ ဘယ်သူလဲ?

LeQuieu၏ ပြသမှုများသည် စိတ်ကူးယဉ်ဆန်သော် လည်း အသေးစိတ်ကျသည်။ တွေ့ဆုံမှုတစ်ခုတွင် သူက “တရားဝင် ဥပဒေပြဌာန်းချက်များ” အရ စက်တပ်ဆင်ရာတွင် နောက်ဆုံး မူလီတစ်ခုကို တပ်ဆင်ပြ၍ မရကြောင်း ပြောကြားပြီး သူက ပြသမှုကို နှုတ်ဖြင့် ဆက်လက်ပြောကြား ခဲ့သည်။

သူ၏ ဟောပြောပွဲသင်ခန်းစာအချို့တွင် သူသည် သူ၏အတိတ်က ကြည်နူးဖွယ်ရာကောင်းသော အတွေ့အကြုံများကို ဝေငှလေ့လည်း ရှိသည်။ – သူနှင့် သူ၏သူငယ်ချင်းများက  ဘိုးလင်းပစ်သည့်ဘောများ ကို ပစ်မှတ်ပြုလုပ်၍ အိမ်လုပ်စိန်ပြောင်းဖြင့် ပစ်ခတ်လေ့ရှိပုံနှင့် အိမ်လုပ်သေနတ်များ သုံး၍ အာဖရိကတိုက်မှ ဆာဟာရမျိုးနွယ်ဝင် “မမ်ဗာ အနက်ရောင်မြွေများ”ကို သတ်ဖြတ်ခဲ့ပုံများ အကြောင်းအား ထုတ်ဖော်ပြောကြားခဲ့သည်။

သူက အခြားလက်နက်တစ်ခုအား ရည်ညွှန်းရာတွင် “တစ်ချို့ကောင်တွေက (ဒီလက်နက်မှာ) ပတ်လည်စနစ်ကို တပ်ဆင်ထားတာ ကျုပ်တွေ့ဖူးတယ်။ အဲဒီစနစ်နဲ့ဆိုရင် သူတို့က အခန့်သား ထိုင်ပြီး ဒက် ဒက် ဒက်နဲ့ ပတ်ချာလည်လှည့်ပြီးတော့ ပစ်လို့ရအောင် လုပ်ထားတာ”ဟု ပြောကြားခဲ့သည်။

LeQuieuက သူသည် မြန်မာနိုင်ငံ၏ သမိုင်းကြောင်း နှင့် လူမျိုးရေးများအကြောင်းကို အနည်းငယ်သာ သိရှိကြောင်း webinar သင်ခန်းစာတစ်ခုအတွင်း ဝန်ခံခဲ့သော်လည်း တပ်မတော်အား ရင်ဆိုင်ရာတွင် အကြမ်းဖက်မှုသည် မရှိမဖြစ် လိုအပ်ကြောင်း သူက အလေးပေးပြောကြားခဲ့သည်။ သို့သော်လည်း ယင်းက ဧပြီလ ၅ ရက်နေ့တွင် စစ်တပ်ကို တိုက်ခိုက်ခြင်းအားဖြင့် ဆန့်ကျင်သူဦးရေ ၃ဝဝဝ အထိ အသက်ဆုံးရှုံးစေနိုင်သည်ဟု ဆိုခဲ့သော်လည်း “စစ်ပွဲကြီးတွေက သေဆုံးမှုနဲ့ယှဉ်ကြည့်ရင် ဒီ သေဆုံးမှု ပမာဏက မပြောပလောက်အောင် နည်းပါတယ်”။

ဂမ္ဘီရဆန်သော “မင်-မာ” တောင်တန်းများတွင် လူဦးရေ ရာဂဏန်းခန့်ကို ဦးဆောင်သည့် စစ်တပ်ခေါင်းဆောင် တစ်ဦးအဖြစ် LeQuieu က သူ့ကိုယ်သူ စိတ်ကူးယဉ်ကောင်း ယဉ်နေလိမ့်မည်။ မည်သို့ပင်ဖြစ်စေကာမူ သူသည် လူထုဆန္ဒပြပွဲများကို ရှုတ်ချခဲ့သည်။ “တပ်မတော်ကို ခံတိုက်မယ့် တပ်ဖွဲ့တွေထဲမှာ ဒီဆန္ဒပြတဲ့သူတွေကို ထည့်ဖို့ ကျုပ်အနေနဲ့ဆိုရင်တော့ တွန့်ဆုတ်နေမိလိမ့်မယ်။ ဘာလို့လဲဆိုတော့ ကျုပ်ကူညီမယ့် လူတွေက ကဒ်ထူဆိုင်းဘုတ်တွေပဲ ကိုင်တတ်ပြီး ပန်းတိုင် တစ်ခုဆီ ရောက်ဖို့ တကယ်လုပ်တတ်မှာ မဟုတ်လို့ပဲ” ဟု ဆိုသည်။

နောက်ပိုင်းအကြိမ်များတွင် တက်ရောက်လာသူများကို LeQuieu က မြန်မာနိုင်ငံသို့ တရုတ်ပြည်မှ ကျူးကျော်မှုနှင့် နောက်ဆက်တွဲ “သွေးထွက်သံယိုမှု” ဖြစ်နိုင်ချေများအကြောင်းကို သတိပေးခဲ့ပြီး “မင်းအပေါ်ကျရောက်ခဲ့ဖူးတဲ့ ထိခိုက်နာကျင်စေမှုတွေအတိုင်း တူညီတဲ့ ထိခိုက်ဆုံးရှုံး နာကျင်စေမှုတွေ ခံရအောင် လုပ်ရမယ်။ ဒါဟာ စိတ်ဓာတ် အားကောင်းလာအောင် လုပ်တဲ့သဘောမျိုးပဲ။ မင်းဟာ လမ်းမှာ စစ်သားတစ်ယောက်ကို တွေ့တဲ့အခါ အဲဒီစစ်သားဟာ ရန်သူဖြစ်ပြီး အဲဒီစစ်သားက သေဖို့  လိုတယ်ဆိုတာကို ခေါင်းထဲမှာ စွဲစွဲမြဲမြဲ မှတ်ထားရမယ်” အလေးအနက်ပြောခဲ့သည်။

ဇွန်လ ၁၄ ရက်နေ့ တွေ့ဆုံပွဲကို တက်ရောက်ခဲ့သော ဒေါက်တာဆာဆာကလည်း တူညီသော ခံစားချက်များကို ထုတ်ဖော်ခဲ့ပြီး ဆက်လက်၍ ဒီမိုကရေစီဖော်ဆောင်ရေး လှုပ်ရှားမှုအတွက် “နိုင်ငံရေး ဦးဆောင်မှု” ကို ပေးဆောင်နိုင်ရန်အတွက်လည်း ကတိပြုခဲ့သည်။

“ချစ်လှစွာသော မိတ်ဆွေများခင်ဗျား၊ ဒီလူတွေဟာ လူဆိုးအကြီးစားတွေ ဖြစ်တယ်ဆိုတာကို ငြင်းဖွယ်ရာမရှိပါဘူး။ ဒါကြောင့် သူတို့ကို ဖယ်ရှားပစ်ဖို့လိုပါတယ်” ဟု သူကဆိုသည်။ “တပ်မတော်လို့ လူသိများတဲ့ ဒီ စစ်ဘက်ဆိုင်ရာ အဖွဲ့အစည်းဟာ မြန်မာနိုင်ငံမှာ ပေါက်ဖွားလာတဲ့ ကင်ဆာရောဂါလိုဖြစ်နေပြီး ကျွန်တော်တို့ ပြည်သူလူထု အကုန်လုံးကို နှိမ်နင်းသတ်ဖြတ်သည်အထိ ဖြစ်လာနိုင်တယ်” ဟု သူက ဆက်လက်ပြောကြားခဲ့သည်။

ထိုအစည်းအဝေး ကျင်းပနေဆဲမှာပင် LeQuieu နှင့် သူ၏ ဆက်ဆံရေးအကြောင်းနှင့် စပ်လျဉ်း၍ New Naratif မှ မေးခွန်းတစ်ခုကို ဖြေကြားရာ၌ ဒေါက်တာဆာဆာက “ကျွန်တော်က တပ်မတော်ကို အားမပေးတဲ့သူ ဘယ်သူနဲ့မဆို ပွင့်လင်းစွာ ဆွေးနွေးလို့ရတယ်။ ဒီမှာ တကယ့်မေးခွန်းက – ခင်ဗျားဟာ ကျွန်တော်တို့နဲ့ တစ်ဖက်တည်း ဟုတ်လား၊ မဟုတ်ဘူးလား ဆိုတာပါပဲ” ဟု ပြန်လည်ဖြေကြားခဲ့သည်။

LeQuieu၏ webinar အွန်လိုင်းသင်တန်းများကို လေ့လာဖူးသူအချို့ကလည်း ၎င်းတို့၏ ထင်မြင်ချက်များကို မှတ်ချက်ပြုခဲ့သည်။ လူ့အခွင့်အရေးအဖွဲ့အစည်း တစ်ခု၏ အမည်မဖော်လိုသူ အကြီးအကဲတစ်ဦးက သူသည် ဖိတ်ခေါ်မှု တစ်ခုကြောင့် ယင်း Zoom အစည်းအဝေး တစ်ခုသို့ တက်ရောက်ခဲ့သော်လည်း ချက်ချင်း ဆိုသလို ပြန်ထွက်သွားခဲ့သည်ဟု New Naratif သို့ ပြောကြားခဲ့သည်။

“ကျွန်တော်တို့က လူ့အခွင့်အရေးအဖွဲ့အစည်း တစ်ခုလေ။ အကြမ်းဖက်မှုကို ကျွန်တော်တို့ မထောက်ခံပါဘူး”ဟု သူက ဆက်လက်ပြောကြားခဲ့သည်။ “အစိုးရမဟုတ်တဲ့ လှုပ်ရှားဆောင်ရွက်သူတွေက လက်နက်ကိုင်မယ် ဆိုရင် သူတို့က စစ်ဥပဒေတွေကို လိုက်နာဖို့လိုတယ်၊ ဒါပေမယ့် ဘယ်လိုပဲဖြစ်ဖြစ် ပြည်ပကပုဂ္ဂိုလ်တွေက မြန်မာနိုင်ငံက လူငယ်တွေကို အကြမ်းဖက်မှုကို သုံးဖို့နဲ့ သူတို့ရဲ့ အသက်ကိုစွန့်လွှတ်ရဲဖို့ဆိုတဲ့ အကြံပြုချက်မျိုး ပေးနေတာကတော့ သိပ်မဟန်တဲ့ အကြံအစည်ပဲ။ ပြီးတော့ ပြဿနာလည်း အကြီးအကျယ် တက်နိုင်တယ်ဗျ။”ဟု ဆိုသည်။

ဒေါက်တာဆာဆာ၏ ပြောရေးဆိုခွင့်ရှိသူတစ်ဦးက NUGဝန်ကြီးသည် “မစ္စတာ LeQuieu နှင့် အနည်းငယ်ရင်းနှီးမှု ရှိသည်။ သို့သော် သူသည် တရားဝင်ဥပဒေများအရ သော်လည်းကောင်း၊ တရားမဝင်လမ်းကြောင်းများအရ သော်လည်းကောင်း NUG အစိုးရအဖွဲ့ (သို့) ဒေါက်တာဆာဆာ၏ အကြံပေးပုဂ္ဂိုလ် မဟုတ်ပါ” ဟု New Naratif သို့ အီးမေးလ်မှတဆင့် ဖြေကြားခဲ့သည်။

“ချစ်လှစွာသော မိတ်ဆွေများခင်ဗျား၊ ဒီလူတွေဟာ လူဆိုးအကြီးစားတွေ ဖြစ်တယ်ဆိုတာကို ငြင်းဖွယ်ရာမရှိပါဘူး။ ဒါကြောင့် သူတို့ကို ဖယ်ရှားပစ်ဖို့လိုပါတယ်။”

ဆိုရှယ်မီဒီယာတွင် “Marc LeQuieu” ဟူသော အမည်ကို ရှာဖွေလိုက်သောအခါ YouTube တွင် သေနတ်ပစ် သင်ခန်းစာများပေးနေသော LeQuieu၏ ပရိုဖိုင်းတစ်ခု ထွက်ပေါ်လာသည်။ မကြာသေးမီက သတ်ဖြတ်ခံထားရသော အာဖရိကန် ကျွဲတစ်ကောင်၏ အသေကောင်ကို ရိုင်ဖယ်နှစ်ခုဖြင့် ထောက်၍ မတ်တပ်ရပ်လျက်ရှိသော Facebook ပရိုဖိုင်းနှင့် အမေရိကန်အစိုးရ ဆန့်ကျင်ရေး လက်နက်ကိုင်အဖွဲ့ Three Percenters ၏ တံဆိပ်ဖြင့် ခေါင်းစီးဓာတ်ပုံတင်ထားသော တွစ်တာ အကောင့် တစ်ခုကိုလည်း တွေ့ရှိခဲ့ရသည်။

LeQuieuက New Naratifသို့ ပေးပို့လာသော အီးမေးလ်တစ်စောင်၌ ထိုတွစ်တာအကောင့်သည် ၎င်းမဟုတ်ကြောင်းနှင့် တံဆိပ်၏အဓိပ္ပာယ်ကို အခြားသူတစ်ဦးကို မေးကြည့်လိုက်တော့မှသာ သိရှိခဲ့ရကြောင်း ပြောကြားခဲ့သည်။

“ဒါ ကျုပ်မဟုတ်ဘူး၊ ကျုပ်အနေနဲ့ ဒီလို အဖွဲ့တွေနဲ့ လည်း လုံးဝဆက်စပ်မှုမရှိဘူး” ဟု သူကဆိုသည်။

သူသည် အမေရိကန်မြေစီမံခန့်ခွဲမှုဗျူရို (US Bureau of Land Management)တွင် ခြောက်နှစ်ကျော် လုပ်ကိုင်ခဲ့သည့်အကြောင်း အပါအဝင် အမေရိကန် အမျိုးသားပန်းခြံ ဝန်ဆောင်မှုအတွက် မီးသတ်သမားအဖြစ် လုပ်ကိုင်ခဲ့ခြင်း နှင့် အိုရီဂွန်ပြည်နယ်တွင် စေတနာ့ဝန်ထမ်း ရဲလက်ထောက်အဖြစ် တာဝန်ထမ်းဆောင်ခဲ့ခြင်းများ ပါဝင်သော လုပ်ငန်းမှတ်တမ်း အသေးစိတ်များကို ဖော်ပြထားသည့် LinkedIn အကောင့်တစ်ခု ဖွင့်ထားခြင်းကိုလည်း ငြင်းဆိုခဲ့သည်။ သို့သော်လည်း New Naratif သည် LinkedInအကောင့်တွင် ဖော်ပြထားသော ဆက်သွယ်ရန်အချက်အလက်များမှ တဆင့် LeQuieu ကို ဆက်သွယ်နိုင်ခဲ့ပြီး Oregon ပြည်နယ်ရှိ အရာရှိနှစ်ယောက်နှင့် BLM အကြံပေးအရာရှိတစ်ဦးတို့က LeQuieuသည် ယခင်က သူတို့ထံတွင် အလုပ်လုပ်ခဲ့ကြောင်းကို အတည်ပြုခဲ့သည်။

LeQuieu သည် အစည်းအဝေးများအတွက် အခကြေးငွေယူခြင်း မရှိဘဲ “(တက်ရောက်လာသူများထဲမှ) မိမိ၏ အသက်ဘေးအတွက် ကိုယ့်ကိုယ်ကို ကာကွယ်ရန် ဆန္ဒပြင်းပြနေသူများ၏ မေးခွန်းများကို ဖြေရန်သာ ကြိုးစားနေခြင်း” ဖြစ်ကြောင်း New Naratif သို့ ပြောကြားခဲ့သည်။

LeQuieu ၏ webinarကို တက်ရောက်ခဲ့သူ ၅ ဦးက သူသည် CIAအတွက် အလုပ်ခဲ့ဖူးသူဟု ထင်မှတ်၍ တက်ရောက်ခဲ့ခြင်း ဖြစ်ကြောင်း New Naratif ထံသို့ ပြောကြားခဲ့သည်။ လူ့အခွင့်အရေးအဖွဲ့အစည်း အကြီးအကဲက “ကျွန်တော် သိရသလောက်ဆိုရင် ဒီလူငယ်တွေ တော်တော်များများဟာ အမေရိကန် စစ်ရေးအရာရှိတစ်ဦးရဲ့ အကြံပေးမှုတွေရမယ်ထင်လို့ သူတို့က တက်ရောက်ခဲ့ကြတာပဲ” ဟု ပြောကြားခဲ့ သည်။

မေလအတွင်းက New Naratif နှင့် ဖုန်းအင်တာဗျူး တစ်ခုတွင် LeQuieuက သူသည် “အမေရိကန် ဗဟိုထောက်လှမ်းရေးနှင့် အစိုးရအဖွဲ့ ၏ ထပ်မံငှား ရမ်းခြင်း”ကို ခံခဲ့ရပြီး အမေရိကန်နိုင်ငံသား  တစ်ဦး ပါဝင်ပတ်သက်သော “ဇင်ဘာဘွေနိုင်ငံပြိုကွဲသော အခါ”ဟုခေါ်သည့် ရှာဖွေကယ်ဆယ်ရေး စစ်ဆင်ရေး တစ်ခုတွင် အစိုးရအဖွဲ့၏ ငှားရမ်းခြင်းခံရပြီးနောက် “ထိန်းသိမ်းကိုင်တွယ်သူ” တစ်ဦးနှင့် လက်တွဲ အလုပ်လုပ်ခြင်း ရှိခဲ့ကြောင်းလည်း ပြောဆိုခဲ့သည်။

“ကျုပ် စစ်တပ်ထဲ တစ်ခါမှ မဝင်ဖူးဘူး။ စစ်ရေးလေ့ကျင့်ရေးသင်တန်းကိုလည်း တစ်ခါမှ မသွားဖူးဘူး” ဟု သူက ဆက်လက်ပြောကြားသည်။ “ကျွန်တော့်အနေနဲ့ ထောက်လှမ်းရေးအေဂျင်စီတွေနဲ့ တစ်ခါမှ အလုပ်မလုပ်ဖူးပါဘူး။ ဒါ သူတို့ တောင်းဆို လို့ပါ။”

နောက်ပိုင်းတွင် LeQuieu က အီးမေးလ်တစ်စောင်၌ ဤသို့ ပြောလာသည် -“တခြားသူတွေက ကျုပ်အပေါ် ဘယ်လိုထင်မြင်လဲဆိုတာကိုတော့ ကျုပ်လည်း မပြောပြတတ်ဘူး။”

LeQuieuအကြောင်း New Naratif မှ ပေးပို့လိုက်သော မေးခွန်းများကို CIA နှင့် အမေရိကန်အစိုးရဌာနတို့က တုံ့ပြန်ခဲ့ခြင်း မရှိပါ။

မြန်မာနိုင်ငံမှ နွားကျောင်းသား (Cowboys)များ

လွန်ခဲ့သော နှစ်ပေါင်း ၆ဝနီးပါးကတည်းက တိုင်းပြည်ကို အုပ်ချုပ်ခဲ့သော တပ်မတော်ကို ဆန့်ကျင်တော်လှန်ရာ၌ မြန်မာ့နိုင်ငံအရေးတွင် ဝင်ရောက်စွက်ဖက်လိုခြင်းသည် LeQuieu ကဲ့သို့သော အနောက်တိုင်းအမျိုးသားများ ပြုမူလေ့ရှိသော ရိုးရာအစဉ်အလာ တစ်ခုပင် ဖြစ်သည်။

၂ဝဝ၉ ခုနှစ်တွင် ဂျွန်ယက်တောအမည်ရှိ အမေရိက န် တစ်ဦးသည် ၂ဝဝ၃ခုနှစ်ကပင် နေအိမ်အကျယ်ချုပ် ချခံခဲ့ရသည့် NLD ခေါင်းဆောင် ဒေါ်အောင်ဆန်းစုကြည်၏ နေအိမ်ထဲသို့ အင်းယားကန်မှ တရားမဝင် ကူးခတ်ဝင်ရောက်ခဲ့ သည်။ ယက်တောက သူ၏လုပ်ရပ်ကြောင့် ဒေါ်အောင်ဆန်းစုကြည်အပေါ်တွင် နိုင်ငံတကာ၏ အာရုံစူးစိုက်မှုရရှိစေပြီး စစ်တပ်က လုပ်ကြံမှုကို တားဆီးနိုင်ခဲ့သည်ဟု ပြောဆိုခဲ့သော်လည်း ၎င်း၏ မဖိတ်ခေါ်ဘဲ လာရောက်မှုသည် ‌ဒေါ်အောင်ဆန်းစုကြည်၏ နေအိမ်အကျယ်ချုပ်စည်းကမ်းကို ချိုးဖောက်သဖြင့် သူ၏ အကျယ်ချုပ်သက်တမ်းကို နောက်ထပ် ၁၈ လ အထိ သက်တမ်းတိုးမြှင့်ခံခဲ့ရသည်။

၁၉၉ဝခုနှစ် အစောပိုင်းကာလများတွင် သြစတေးလျ စစ်မှုထမ်းဟောင်း David Everettသည် မြန်မာနိုင်ငံရှိ ကရင်ပြည်နယ် အရှေ့ပိုင်းတွင် ကိုယ်ပိုင်အုပ်ချုပ်ခွင့် ရရှိရေးအတွက် နှစ်ပေါင်း ၇ဝ ကျော်ကြာ တိုက်ခိုက်နေကြသော KNLAအတွက် လက်နက်များ ဝယ်ယူပေးရန် နှင့် ရန်ပုံငွေ ရှာဖွေပေးနိုင်ရန်အတွက် ပြန်ပေးဆွဲမှုနှင့် လုယက်မှုများကို ဆက်တိုက်ကျူးလွန်ခဲ့သည်။ သူသည် သြစတေးလျနိုင်ငံ၏ အလိုရှိဆုံး ရာဇဝတ်သားများ ထဲမှ တစ်ဦးဖြစ်လာပြီး ထောင် ၁ဝ နှစ် ကျခံခဲ့ရသည်။

မြန်မာနိုင်ငံသမိုင်းတွင် “ကောင်းဘွိုင်း အတော်များများရှိသည်”ဟု မြန်မာနိုင်ငံအကြောင်း လေ့လာနေသော သုတေသနပညာရှင် Kim Jolliffe က ဆိုသည်။ သူက ယင်းကောင်းဘွိုင်းများထဲတွင် စစ်ဖြစ်ရာ ဒေသတစ်ခု၏ပြင်ပတွင် မည်သို့နေထိုင်ရမည်ကို မသိတော့သော စိတ်ဒဏ်ရာရ စစ်သားများ၊ စိတ်လှုပ်ရှားဖွယ်ရာ သို့မဟုတ် လွယ်ကူသော ဇာတ်လမ်းများကိုသာ လိုချင်သော သတင်းထောက်များ (သို့) စိတ်ရင်းအမှန်ဖြင့် ကူညီလိုသော ကျွမ်းကျင်သူပညာရှင်များစသဖြင့် မျိုးစုံပါဝင်ကြသည် ဟုဆိုသည်။

“မြန်မာနိုင်ငံမှာ လူတွေက ဘယ်သူက ဘယ်သူလဲဆိုတာ သိဖို့ခက်ခဲတယ်၊ ဘယ်သူက အန္တရာယ်ပြုနိုင်တဲ့လူတွေ ဆိုတာလည်း သိဖို့ခက်တယ်” ဟု Joliffe က ဆိုသည်။

“လွန်ခဲ့တဲ့နှစ် ၇ဝကတည်းက ပုန်ကန်မှုတွေကို ချေမှုန်းရေးမှာ အတွေ့အကြုံရှိတဲ့ တပ်မတော်ကို ဒီကလေးတွေက ဆန့်ကျင်တဲ့အခါမှာ လေ့ကျင့်မှု လုံလောက်စွာ မရရှိသေးပါဘူး။”

“အာဖဂန်နစ္စတန်နိုင်ငံ၊ ဟဲရတ်မြို့ မှာ ရုရှားတပ်ဖွဲ့တွေကို တိုက်ခိုက်ကြတဲ့အခါ မူဂျာဟစ်ဒင်တွေနဲ့အတူ တိုက်ခိုက်ခဲ့ပြီး နောက်ပိုင်းမှာ KNLA ဘက်ကနေ တပ်မတော်ကို ဆန့်ကျင်တိုက်ခိုက်ရင်း သေဆုံးခဲ့တဲ့ အမေရိကန် စစ်မှုထမ်းဟောင်းတစ်ယောက်လည်း ရှိခဲ့တယ်” ဟု လုံခြုံရေးဆိုင်ရာ လေ့လာဆန်းစစ်သူ Davis က ဆိုသည်။

“ပဋိပက္ခတိုင်းမှာ ဝါဒဖြန့်ကျက်ရေးအတွက် (သို့) အမှန်ဧကန် စိတ်ဝင်စားမှုရှိ၍ ပါဝင်ပတ်သက်လိုသော နိုင်ငံခြားသားများရှိသည်။”ဟု Davisက ဆိုသည်။ “တစ်ချို့က အတွေးအခေါ်၊ နိုင်ငံရေး (သို့) ဘာသာရေး ရည်ရွယ်ချက်တွေကြောင့်၊ တစ်ချို့ကတော့ စိတ်လှုပ်ရှားမှုသီးသန့် အတွက်ကြောင့် ဝင်ရောက်ပတ်သက်တာတွေ ရှိတယ်။ ဒီဘက်ခေတ်မှာတော့ သူတို့က သိပ်ပြီး အသက်စွန့်စားစရာ မလိုတော့ဘူး။ အခုခေတ်မှာ သူတို့က ‘လေ့ကျင့်ရေး’ကို အွန်လိုင်းမှာ သင်တန်းပေးလို့ရတယ်လေ။”ဟု သူက ဆိုသည်။

နောက်ဆုံးတိုက်ပွဲ

မြန်မာနိုင်ငံရှိ စစ်အာဏာသိမ်းမှု ဆန့်ကျင်ရေးလှုပ်ရှားမှုများ၏ အစောပိုင်း နေ့ရက်များတွင် နိုင်ငံတစ်ဝှမ်းလုံးရှိ လမ်းမများပေါ်တွင် ငြိမ်းချမ်းစွာ ဆန္ဒပြခဲ့ကြသော လူဦးရေ အရေအတွက်သည် စံချိန်တင်နိုင်လောက် အောင်များပြားခဲ့သည်။ စစ်တပ်က အာဏာသိမ်းခဲ့သည့် ပထမအပတ်များမှစ၍ ဆန္ဒပြသူများကို သေနတ်နှင့် ပစ်ခတ်သော်လည်း တန်ပြန်အကြမ်းဖက်မှုများစွာ မရှိခဲ့ပါ။ LeQuieu သည် သူ၏ ပထမဆုံး Zoom အစည်းအဝေး အချို့ကို ယင်းကာလအတောအတွင်း၌ ကျင်းပခဲ့ချိန်၌ တက်ရောက်သူများအနေဖြင့် ကျည်ကာဒိုင်းများနှင့် ကိုယ်ထည်သံချပ်ကာ ပြုလုပ်နည်းများအကြောင်းကို သာ အဓိက စိတ်ဝင်စားခဲ့ကြသည်။

သို့သော် မတ်လနှောင်းပိုင်းတွင်မူ တပ်မတော်သည် မကြာခဏဆိုသလို အစုလိုက်အပြုံလိုက် သတ်ဖြတ်မှုများ ပြုလုပ်လာပြီး တစ်ချိန်က ငြိမ်းချမ်းစွာဆန္ဒပြခဲ့သော တက်ကြွလှုပ်ရှားသူအချို့ သည် ထိုးစစ်နည်းဗျူဟာများဘက်သို့ ခြေဦးလှည့်ခဲ့ကြသည်။

ဧပြီလ ၅ ရက်နေ့ LeQuieu၏ Zoom သင်ခန်းစာတစ်ခုတွင် တက်ရောက်သူတစ်ဦး က “Marc ရေ၊ ကျေးဇူးပြုပြီး ပိုက်နဲ့လုပ်တဲ့ ဗုံးတည်ဆောက်ဖို့ ငါတို့ကို သင်ပေးပါလား”ဟု ရေးသားခဲ့သည်။

ရက်သတ္တပတ် အနည်းငယ်အကြာတွင် သူသည် စတီးပိုက်အတွင်းသို့ မူလီ၊ ဝက်အူများနှင့် ဖောက်ခွဲရေးပစ္စည်းများကို မည်သို့ဖြည့်ရမည်ကို နှုတ်ဖြင့် ရှည်လျားစွာ ရှင်းပြခဲ့သည်။

“အခုပြောနေတာတွေ ရှင်းရဲ့လား၊  ဒါမှမဟုတ် ကျုပ်ကိုယ်တိုင် ပိုက်သွားယူပြီး ဗုံးကို တည်ဆောက်ပြရမလား” ဟု ပြောလျက် “နောက်တာပါ၊ တကယ်ပြောတာပါ” ဟူ၍ LeQuieu က အဆုံးသတ်ခဲ့သည်။

အာဏာသိမ်းပြီးနောက် ငြိမ်းချမ်းစွာ လမ်းပေါ်ထွက် ဆန္ဒပြမှုများတွင် ပါဝင်ခဲ့သော အစိုးရအတိုင်ပင်ခံဟောင်း (အမည်ဝှက်) ကျော်* သည် ရဲအရာရှိများအား ဒီမိုကရေစီလိုလားသော လှုပ်ရှားမှုဘက်သို့ ဝင်ရောက်ရန် စည်းရုံးကြိုးစားခဲ့သေးသည်ဟု ဆိုသည်။ သို့သော်လည်း နောက်ဆုံးတွင် သူသည် ဤသို့ပြုလုပ်ခြင်းဖြင့် စစ်အာဏာရှင်စနစ်ကို မောင်းထုတ်နိုင်လိမ့်မည်ဟူသော မျှော်လင့်ချက် ပျောက်ဆုံးသွားပြီး စစ်တပ်အရာရှိများနှင့် ၎င်းတို့၏ မဟာမိတ်များဟု ယူဆရသော အုပ်စုများကို တိုက်ခိုက်သည့် မြို့ပြပြောက်ကျားအုပ်စုများနှင့်သာ ပူးပေါင်းရန် ဆုံးဖြတ်ခဲ့သည်။

“ကျွန်တော်တို့က အစွန်းရောက်တွေ မဟုတ်ဘူး။ ကျွန်တော်တို့က အကြမ်းဖက်သမားတွေမဟုတ်ဘူး။ အာဏာသိမ်းမှုမတိုင်ခင်က ကျွန်တော်လည်း သာမန်အရပ်သားတစ်ဦးပဲ၊ စီးပွားရေးသမား တစ်ယောက်ပဲ၊  ရန်သူတွေကို သတ်ဖို့တောင် ဆန္ဒမရှိခဲ့ဘူး” ဟု ဦးကျော်ကဆိုသည်။ “(ဒါပေမယ့်) သူတို့က အကြမ်းမဖက်တဲ့နည်းလမ်းတွေရဲ့ လမ်းစ ကို ပိတ်ဆို့ခဲ့တယ်လေ။”

LeQuieuထံမှ သင်ယူခဲ့သော သူ၏ ကျွမ်းကျင်မှုများ မှာ – လက်နက်များ ထုတ်လုပ်ပုံ၊ တာယာများကို ဖြတ်တောက်ခြင်းနှင့် စစ်ဘက်ဆိုင်ရာ လေဆိပ်ပြေးလမ်းများကို ဖျက်ဆီးခြင်းဖြင့် စစ်တပ်ရိက္ခာကို ဖြတ်တောက်ခြင်းစသဖြင့်။ ဤ ကျွမ်းကျင်မှုများကြောင့် စစ်တပ်ကို အာဏာမှ ဖယ်ရှားရာတွင် အထောက်အကူဖြစ်နိုင်သည်ဟု ယုံကြည်လာသည်ဟု သူကဆိုသည်။

“ကျွန်တော်နဲ့ ကျွန်တော့် သူငယ်ချင်းတွေက ဒါဟာ နောက်ဆုံးတိုက်ပွဲပဲ ဖြစ်ရမယ်လို့ ဆုံးဖြတ်ထားတယ်” ဟု ဦးကျော်ကဆိုသည်။

“ကျွန်တော်တို့က အစွန်းရောက်တွေ မဟုတ်ဘူး။ ကျွန်တော်တို့က အကြမ်းဖက်သမားတွေမဟုတ်ဘူး။ …(ဒါပေမယ့်) သူတို့က အကြမ်းမဖက်တဲ့နည်းလမ်းတွေရဲ့ လမ်းစ ကို ပိတ်ဆို့ခဲ့တယ်လေ။”

လေ့လာသုံးသပ်သူ Davis က “တပ်မတော် နှင့် ခုခံစစ်တိုက်ခိုက်ရာတွင် PDF (ပြည်သူ့ကာကွယ်ရေးတပ်မတော်) မှ ရာပေါင်းများစွာသော လူငယ်များ မလိုအပ်ဘဲ အသက်ဆုံးရှုံးလိမ့်မည်ဟု ယုံကြည်ထားပြီး စစ်အုပ်ချုပ်ရေးကို နှစ်ပေါင်းများစွာ အဓွန့်ရှည်စေနိုင်ဖွယ် ရှိပြီး ဒါဟာ မဟာဗျူဟာ ကျရှုံးမှုကြီးတစ်ခု ဖြစ်သွားနိုင်တယ်” ဟု ယုံကြည်ထားသည်။

LeQuieu၏အစည်းအဝေးများသို့ မကြာခဏ တက်ရောက်ဖူးသော (အမည်ဝှက်) အောင်* က လမ်းပေါ်ထွက် ဆန္ဒပြမှုများ၏ ထိရောက်မှုကို အားမရတော့ကြောင်း ပြောကြားခဲ့သည်။ သို့သော် ပြောက်ကျားအုပ်စုများနှင့် ပေါင်းစည်းခြင်း ထက်စာလျှင် သူသည် စစ်တပ်သစ္စာခံများအား စိတ်ဓာတ်စစ်ဆင်ရေး ဆင်နွှဲရန်နှင့် စစ်သားများအား အာဏာဖီဆန် စွန့်ခွာရန် အားပေးသည့် ရန်ကုန်အခြေပြု အဖွဲ့တစ်ဖွဲ့နှင့် ပူးပေါင်းခဲ့သည်။ ထို့အပြင် LeQuieu ၏ အစည်းအဝေးများသည် လူအများအား လမ်းမှားသို့ ဦးဆောင်နေမိမည်ကို သူက စိုးရိမ်ကြောင်း ဖွင့်ဟပြောဆိုခဲ့သည်။

“ကျွန်တော်တို့က လူတိုင်းသဘောတူတဲ့ တူညီတဲ့တန်ဖိုးတွေ၊ တူညီတဲ့တောင်းဆိုချက်တွေနဲ့ လုပ်ငန်းစဉ်တွေကို တစိုက်မတ်မတ် ဆောင်ရွက်ဖို့ ညွန့်ပေါင်းအဖွဲ့တစ်ဖွဲ့ကို ဖွဲ့ချင်တယ်။ ပြီးတော့  နိုင်ငံရေးကို အသုံးချပြီး အကြမ်းမဖက်တဲ့ လမ်းကြောင်းတစ်ခုဆီကို လူတွေကို တွန်းပို့ချင်တယ်” ဟု သူကဆိုသည်။ “အကြမ်းဖက်တိုက်ခိုက်ဖို့ စီစဉ်တာတွေ ထက်စာရင် အာဏာဖီဆန် စွန့်ခွာမှုတို့၊ တော်လှန်ရေး လှုပ်ရှားမှုတွေကို ခိုင်မြဲစေမှုတို့အပေါ်မှာ လူတွေရဲ့ အာရုံကို ပိုစိုက်စေချင်တယ်”။

အောင့်အနေဖြင့် သူ၏ရဲဘော်များသေဆုံးခြင်းကို နည်းနိုင်သမျှနည်းအောင်သာ ဖြစ်စေချင်သည်။

“အကြမ်းမဖက်တာက နည်းဗျူဟာအရ ပိုအားသာတယ်လို့ ယူဆတာပဲ”ဟု သူကဆိုသည်။ “လွန်ခဲ့တဲ့နှစ် ၇ဝကတည်းက ပုန်ကန်မှုတွေကို ချေမှုန်းရေးမှာ အတွေ့အကြုံရှိတဲ့ တပ်မတော်ကို ဒီကလေးတွေက ဆန့်ကျင်တဲ့အခါမှာ လေ့ကျင့်မှု လုံလောက်စွာ မရရှိသေးပါဘူး။” ဟု ထပ်လောင်းပြောကြားခဲ့သည်။

သြဂုတ်လ ၉ ရက်နေ့တွင် ထုတ်ပြန်သော NUG အစီရင်ခံစာတစ်ခုအရ ဇွန်လနှင့် ဇူလိုင်လတို့တွင် ဖြစ်ပွားခဲ့သော တိုက်ပွဲ ၇ဝဝကျော်တွင် ထို “လေ့ကျင့်မှု လုံလောက်စွာ မရှိသေးသော ကလေးများ”၏ တိုက်ခိုက်မှုကြောင့် စစ်သားဦးရေ ၁,၁ဝဝ ကျော် သေဆုံးခဲ့ပြီး ဖြစ်သည်။ တစ်ချိန်တည်းမှာပင် ဒီမိုကရေစီအရေး လှုပ်ရှားမှုတွင် စစ်မှုထမ်းများအနေဖြင့် ပါဝင်လာနိုင်စေရန် ကူညီပေးလျက်ရှိသော အဖွဲ့ဖြစ်သည့် ပြည်သူ့ရင်ခွင်အဖွဲ့၏ ဩဂုတ်လနှောင်းပိုင်း စာရင်းများအရ စစ်သားနှင့် ရဲ ၂၅ဝဝ ကျော်ခန့်က အာဏာဖီဆန် စွန့်ခွာခိုလှုံလာခဲ့ကြသည်ဟု ခန့်မှန်းရပြီး CDM လှုပ်ရှားမှုများတွင် ပါဝင်လာခဲ့ကြသည် ဟုဆိုသည်။

အာဏာသိမ်းမှု ဆန့်ကျင်ရေး တိုက်ခိုက်ရေးသမားများ၏ ပစ်မှတ်ထား လုပ်ကြံသတ်ဖြတ်မှုများကလည်း မရည်ရွယ်ပဲ အရပ်သားများအပေါ် အန္တရာယ် ကျရောက်စေနိုင်သည်။ မေလတွင် ဖြစ်ပွားခဲ့သော လုပ်ကြံမှုတစ်ခုတွင် လူသိများသော စစ်တပ်ထောက်ခံသူတစ်ဦး၏ မင်္ဂလာဆောင်၌ ပါဆယ်ဗုံးတစ်လုံး ပေါက်ကွဲခဲ့သော်လည်း သူ့အား သေစေမည့်အစား သူ၏ သတို့သမီးနှင့် ဆွေမျိုးနှစ်ဦး ကို သေစေခဲ့သည်။ ဤတိုက်ခိုက်မှုကြောင့် အသက် ၆ နှစ်အရွယ် မိန်းကလေးတစ်ဦးလည်း ဒဏ်ရာရရှိခဲ့သည်။

“ဖြစ်ဖြစ် ပြည်ပကပုဂ္ဂိုလ်တွေက မြန်မာနိုင်ငံက လူငယ်တွေကို အကြမ်းဖက်မှုကို သုံးဖို့နဲ့ သူတို့ရဲ့ အသက်ကိုစွန့်လွှတ်ရဲဖို့ဆိုတဲ့ အကြံပြုချက်မျိုး ပေးနေတာကတော့ သိပ်မဟန်တဲ့ အကြံအစည်ပဲ။ ပြီးတော့ ပြဿနာလည်း အကြီးအကျယ် တက်နိုင်တယ်ဗျ။”

NUGနှင့်သက်ဆိုင်သူ ဖြစ်စေ၊ မသက်ဆိုင်သူဖြစ်စေ ကျင့်ဝတ်စည်းမျဉ်း ဖောက်ဖျက်သော အာဏာသိမ်းမှု ဆန့်ကျင်ရေး တိုက်ခိုက်ရေးသမားများအပေါ်တွင် NUGအနေဖြင့် တာဝန်ယူမှု၊ တာဝန်ခံမှုများ ထားရှိရန် လိုအပ်သည်ဟု သုတေသီ Jolliffeက ဆိုသည်။ ထိုသို့မပြုလုပ်လျှင် တပ်မတော်အနေဖြင့် နိုင်ငံတွင်းရှိ တိုက်ခိုက်မှုတိုင်းနှင့်စပ်လျဉ်း၍ NUG ကို အပြစ်တင်လိမ့်မည် ဖြစ်သည်။ ထို့အပြင် စစ်ကောင်စီအစိုးရက NUG ကို အကြမ်းဖက်အဖွဲ့အစည်းအဖြစ် သတ်မှတ်ထားပြီးသားလည်း ဖြစ်သည်။

“လူလိမ်များနှင့် အာဏာရှင်များသည် သူတို့၏လက်အောက်တွင် ကျင့်ဝတ်ချိုးဖောက်သူများမရှိကြောင်း ပြောလေ့ရှိကြသော်လည်း စစ်မှန်သော တရားဝင် အစိုးရ ကိုယ်စားလှယ်များအနေဖြင့် ဤအချက်မှာ မဖြစ်နိုင်သောကြောင့် ထိုကဲ့သို့ ပြောကြားလေ့မရှိပါ” ဟု Joliffe ကဆိုသည်။ “အဲဒီ့အစား သူတို့က အပြစ်မကင်းစင်တဲ့ လုပ်ရပ်တွေ၊ အမှားတွေ ကျူးလွန်မိခဲ့ပေမယ့် သူတို့အနေနဲ့ ဒီကိစ္စတွေနဲ့စပ်လျဉ်းပြီး ကိုင်တွယ်ဖြေရှင်းတာကို ပြသဖို့ လုပ်ငန်းစဉ်တစ်ခုရှိရပါမယ်။”

NUG အနေဖြင့် ၎င်းတို့၏ လက်နက်ကိုင်အဖွဲ့များ၏ ပြစ်မှုကျူးလွန်မှုများအတွက် မည်ကဲ့သို့ တာဝန်ယူပုံ သို့မဟုတ် မကြာသေးမီလများအတွင်း ဖြစ်ပွားခဲ့သော ရာနှင့်ချီသည့် ဗုံးပေါက်ကွဲမှုများနှင့် လုပ်ကြံသတ်ဖြတ်မှုများ ကို စုံစမ်းစစ်ဆေးမှုများ ရှိ၊ မရှိ ဒေါက်တာဆာဆာအား မေးမြန်းခဲ့ရာတွင် ဖြေကြားခဲ့ခြင်း မရှိပါ။

ဇွန်လ ၁၄ ရက်နေ့တွင် တွေ့မြင်ခဲ့ရသော LeQuieu ၏ စစ်ဆင်ရေးနည်းဗျူဟာများနှင့်ပတ်သက်၍ အချို့သော ဗျူဟာများက နိုင်ငံတကာဥပဒေကို ချိုးဖောက်နိုင်ပြီး အရပ်သားများကို ထိခိုက်မှုမရှိစေရန် ညွှန်ကြားထားသည့် NUG ၏ ညွှန်ကြားချက်နှင့်လည်း ဆန့်ကျင်နေပုံကို  မေးမြန်းသောအခါ ဒေါက်တာဆာဆာ က အီးမေးလ်မှတဆင့် ဖြေကြားခဲ့သည် -“ဘယ်သူမှ စစ်ရာဇဝတ်မှုတွေကို မမြင်ချင်ပါဘူး။ [တစ်စုံတစ်ခု] ကြောင့် လူသားမဆန်တဲ့ လုပ်ရပ်တွေ ဖြစ်ပေါ်လာနိုင်စေမယ်ဆိုရင်တောင် ကျွန်တော်တို့ လုံးဝ လုပ်ဆောင်မှာ မဟုတ်ပါဘူး…[ကျွန်တော်တို့] ကြိုးစားအားထုတ်နေတဲ့ အရာတွေက လူသတ်အာဏာရှင်နဲ့ ရင်ဆိုင်နေရပေမယ့် သတ္တိအားကောင်းတဲ့ မြန်မာပြည်သူလူထုရဲ့ အသက်အိုးအိမ်ကို ကယ်တင်နိုင်ဖို့နဲ့ တခြား ရွေးစရာလမ်းမရှိတော့ဘဲ မိမိကိုယ်ကို ခုခံကာကွယ်ဖို့သာ ဖိအားပေးခံရတဲ့သူအတွက် အားထုတ်နေရတာပဲ ဖြစ်ပါတယ်။”

ဒေါက်တာဆာဆာ တက်ရောက်ခဲ့သော Zoom အစည်းအဝေး ကျင်းပသည့်နေ့မှာပင် LeQuieu က – သူနှင့် NUG ပြောရေးဆိုခွင့်ရှိသူနှင့် မကြာခင်က စကားစမြည်ပြောဆိုသည့်အကြောင်းကို ပြန်ပြောင်းပြောဆိုပြီးနောက် ၎င်းနှင့် ယခုတက်ရောက်နေကြသော လှုပ်ရှားတက်ကြွသူ များနှင့် တိုက်ခိုက်ရေးသမားများနှင့် အမေးနှင့်အဖြေ အစည်းအဝေးများ ဆက်တိုက်ပြုလုပ်ခဲ့ခြင်းမှ ယခုကဲ့သို့ အကြီးအကဲများ တက်ရောက်လာခြင်းမှာ အောင်မြင်မှုတစ်ခုပင် ဖြစ်သည် ဟုဆိုသည်။

သူက “ဒေါက်တာဆာဆာ[နဲ့] NUG ကို ကူညီထောက်ပံ့ပေးချင်တယ်။ ကျုပ်တို့ရဲ့ နှလုံးသားက အဲဒီ့ပုဂ္ဂိုလ် အားထုတ်ကြိုးပမ်းနေတဲ့ အရာတွေနဲ့ ကိုက်ညီတယ်။ ဒီလူဟာ တကယ်ကို လေးစားစရာကောင်းတဲ့ ပုဂ္ဂိုလ်တစ်ယောက်ပါ။”ဟု ဆိုသည်။

ဆက်လက်၍ သူက အောက်ပါအတိုင်း ဆိုသည် – “ကျုပ်တို့က မေတ္တာကို ဖြန့်ကျက်ဖို့ တကယ်ကြိုးစားနေတယ်။ ကျုပ်က အဲ့လိုပြောတော့ ​​လူတွေရယ်ကြတယ်။ ဘာလို့လဲဆိုတော့ ကျုပ်က အခြားလူသားတစ်ဦးကို ထိခိုက်ဒဏ်ရာရစေမယ့် နည်းလမ်းတွေကို လူတွေကို သင်ကြားပြသပေးနေလို့ ပဲပေါ့။ ဒါပေမယ့် သူတို့ကို ဒါတွေ သင်ကြားပြသပေး တယ်ဆိုတာက သူတို့ဆီမှာ နောက်ဆုံး ရွေးချယ်စရာ မရှိတော့ရင် ကိုယ့်ကိုယ်ကို ဘယ်လို ခုခံကာကွယ်ရ မယ်ဆိုတာကို အဓိက ဝေမျှပြသပေးချင်လို့ပဲဗျ”။

*ဤပုဂ္ဂိုလ်များ၏ လုံခြုံရေးအတွက် အမည်လွှဲပြောင်းထားခြင်း ဖြစ်သည်။

Jacob Goldbergမှ ဖြည့်စွက်တင်ပြသည်။